Relasiona ho Programa Primeiru Guvernu Konstitusional Timor Leste ne’ebe fahe osan cash ba komunidade sira iha Dili iha loron 4 Maiu no Distritu Liquisa iha loron 7 Maiu 2007 osan ne’ebe ne’ebe entrega ofisialmente husi Ministru Agrikultura inklui mos Distritu Maliana ne’ebe fahe husi Ministru Administrasaun Estatal. Lalenok Ba Ema Hotu (LABEH) hanesan ONG anti korupsaun ida la aseita ho sistema guvernu nian atu fahe osan cash ne’e.
LABEH la kontra prosecu desenvolvimentu komunitaria ne’ebe implementa husi II Guvernu Konstitusional maibe metodu fahe osan ne’e maka la tuir nesecidade povu nian no laiha akuntabilidade, tamba laiha verifikasaun ida husi grupu ne;ebe simu osan ne’e. Guvernu tenki halo verifikasaun ne’ebe klaru molok fo osan cash ba povu.
DR. Christopher Henry Samson, Hanesan Direktur Executivo LABEH hateten katak Guvernu laiha mekanismu ida diak atu kontrola orsamentu ne’ebe fahe no Guvernu laiha mekanismu ida diak atu identifika vantajen no disvantajen husi orsamentu ne’ebe fahe.Tuir LABEH osan ne’ebe fahe ne’e so fo deit vantajen ba individu ne’ebe simu osan ne’e duke povu iha suku laran.
“LABEH hare katak sistema ne’ebe Guvernu uza ne’e foun no halo ema hotu hakfodak, tamba saida durante tinan 5 la halo ida ne’e, maibe wainhira atu remata ona mandatu no tama ona ba eleisaun maka foin mehi. Tamba ne’e LABEH la aseita ho sistema ne’ebe Guvernu uza dadaun. Tamba saida mak osan ne’e la entrega ba Ministeriu Desenvolvimentu, orsamentu ne’e kan tama iha fundu dezenvolvimentu komunitaria ne’ebe aloka iha orsamentu estadu atu hadia komunidade nia nesecidade lor – loron hanesan be – mos no seluk tan”. Hateten Christopher.
Tuir LABEH nia hanoin planu atu alkansa dezenvolvimentu komunidade ne;e diak ona, maibe tenki liu husi verifikasaun no mekanismu ida ne’ebe transparente no akuntabilidade atu bele hetan responsabilidade ba individu ka grupu no sucu ne’ebe simu osan ne’e.
Dili 8 Maiu 2007
